60 Jahre Leben in einer Blankenese Familie

Herbert Höwel

Utflug mit de School

An n heeten Sommerdag weern wi Schöler froh, dat n Utflug ansett weer. Egol wohenn, Hauftsook keen Ünnerricht. Vun Niemölen mit Schipp no Düvelsbrüch. Weer nich lang, man wi mussen still sitten. Op den Padd no Blanknes wulln wi toben, liekers wi mussen Planten un Bööm ankieken un latinsche Nomen leern, de wi gau wedder vergeten hefft.

In Blanknes erstmol alle hensetten un dat Pausenbrot eten. Achteran keem n Vördrag öber Ebbe un Floot, Baken, Tünn, ünnerschedliche Scheep. Int Woter dörvt wi nich, Strandburg boon wulln wi nich, harn jo keen Schüffeln un weer to heet.

Trüch mit Schipp vun Bulln no Niemölen. Dor vun Pauker opfordert, glieks no Huus to goon. Sünd de meisten ook, man n poor weer dat noch to heet: Wi kunn eegentlich noch int Woter. Keeneen harr n Bodbüx, makt nix, kiekt jo nüms. Dat weer wunnerscheun, swemmen, spritzen, toben. So harrn wi uns den Utflug dacht. Afdreugt mit n Ünnerhemd so goot as gung. In Strümp, Schoh un Ünnerbüx backt noch Sand, makt nix, weern scheunen Utflug.

Sagebiels Treppe

Fröhjohr 1939 – de Danzschool Stöver makt Afdanzball för den Kurs vun de Fortgeschrittenen. No Uhlenhorster Fährhuus för den Twüschenball un Hotel Esplanade för den Afdanzball för de Anfänger, weer dütmool Sagebiel utsöcht.

Een wunnerscheuner, warmer Obend. Ick as ‚wohlhabender’ koopmännischer Stift bestell ne ganze Buddel Wien, dat hett mien Dischdame bannig imponeert. Wi danzten veel, wi drunken veel un dorvon ward uns heet. Ick segg to se: „Kumm wi daal no’n Bulln, ant Woter ward uns köler“. Is n langen Weg worn daal un wedder rop. Nich wegen de veelen Stufen, nee, wegen de Pausen. De Nacht weer – na, kannst di woll denken. Wi hefft denn ook noch veel danzt. As Kavalier brocht ick se no Huus, no Poppenbüttel. De Fohrt mit de S-Bohn weer nich so lang as Sagebiels Trepp daal un rop. Weer dat n scheuner Afdanzball.

Sößtig Johrn Blanknes

1935 Sünnavend „Staatsjugendtag“ för de Hitlerjugend. In Altna bi n Bohnhoff fröh morgens anpedden ton Marsch no Blanknes. An Falkensteener Ufer töft op uns ne annere Schar to n Gelännespeel gegenenanner. Liekers dat n langen Marsch weer, harrn wi noch Knööv nog för de Kloppere un de het Spoß makt. Trüch to Foot na Altna weer plackerig, man S-Bohn keem nich in Frog.

1965 wedder no n Falkensteener Ufer. Dütmol mit Fro un Kinner, Deern tein Johr, Jung acht Johr. Bit Blanknes mit de S-Bohn, dör Hesse-Park un Schinckel-Park. Man bi t Woterwark op de Schossee dään jem de Feut weh. Langt jüst noch för den Römschen Goorn, n Is in Pavillon an Strandweg, ton Bulln un mit Schipp no Altna.

1995 wedder 30 Johrn later park ick mien Auto bi de Bökerhall. Wenn keen vun de Enkels bi mi is, renn ick mit min Knipskist so as Fitnestraining de Treppen op un dool, meuglichst veel „malerische Winkel“ to finnen.. An End denn je no Johrstiet Koffi or Grog op n Bulln un achternan rop ton Parkplatz.